AMANCÊ YEWÎYA ŞAREDARÎYANÊ MINTIQAYA ANATOLÎYA BAŞÛRÎ-ROJHELATÎ

Yewîye, seba ke wezîfe û xizmetê şaredarîyanê endaman ê ke cêr ra îzeh bîyê bîyaro ca, xebate kena:

• Şaredarîyê ke Maddeya 5. de vîyartê, binê banê Yewîye de kena arê.
• Seba pawitişê heq û menfeetanê şaredarîyanê endaman xebate kena, seba xurtkerdişê kapasîteyê rayberîyanê herêmkîyan û karkeran xebate kena
• Seba teşwîqkerdişê xebatanê şaredarîye û bajarwanîye; mabênê endaman de vurnayîşê zanayîş û tecrube temîn kena. Seba nê amacî, tetbîqatê weşî ke do bibê nimûne destek dana, xelat dana û seba ke mabênê endaman de vila bibo cehd kena.
• Cayê xebate yê şaredarîyan û rayberîyanê herêmkîyan de perwerde û cigêrayîşê hemkaran kena, enstîtuyê cigêrayîşî, akademîya rayberîya herêmkî ronena, îdare kena. Averşîyayîşê şaredarîye yê dinya taqîb kena; babetanê ke şaredarîyan eleqedar kenê de workshop, panel, sempozyum, kombîyayîşê masaya girdeke, gêrayîşê teknîkî û meslekî ûsn. organîze kena. Seba melumatdayîşê şaredarîyan her tewir fealîyetê çap û weşanî kena.
• Şaredarîyanê endaman rê; mişawirîya teknîkî, xizmetê plan û projeyî pêşkêş kena. Bazarê zere û teber ra hacet-cîhaz, makîneyê karî ûsn. hîbe gêna, êrînena, parkê wasitayanê ortaxî ronena û îmkananê hîbe/kredî yê zere û teber ra îstîfade kena.
• Yewîye, bi sazgehanê şarî yan zî şîrketanê ke înan ronayê yan zî cayanê ke eleqedarê wezîfeya şaredarîyan ê de şîrketan ronena, xebitnena, dana xebitnayene. Malzemeyê awanî û awanî, seba xizmetanê bajarî hacet û cîhazê lazimî virazena û temîn kena. Sewiyanê cîya-cîyayan de merkezê mesrefî virazena û seba organîzekerdişê mesrefî tesîsê lazimî ronena û xebitnena. Cayanê ke kewenê qadê fealîyetê aye de seba ke hewcedarîye temîn bibo, teşebusanê îqtîsadî kena, mal û xizmetanê endûstrîyelî berhemî kena.
• Seba ke potansîyelê turîzmî yê mintiqayî bêro meydanroşnayî û erjanê derdor/tarîx/kulturî bêrê pawitene; her tewir proje û xebate rê destek dana, îmkananê xo seferber kena. Teşekulanê derdorparêz û kulturîyan rê pêşengîye kena yan zî tede ca gêna, xebate ramena. Xizmetê ke yew ra zêde şaredarîyanê endaman eleqedar kenê, pawitişê erjanê kultur û derdorî yê ortaxî, girewtişê wasitayê xizmetê ortaxî ûsn., eke şaredarîyê eleqedarî selahîyet bidê, pîya ana ca.
• Derheqê pawitişê derdorî û îdarekerdişê atikan de miqyasê herêmkî de, xebatê plankerdişê ortaxî û projekerdişî kena û tetbîq kena, seba ke çareserîya problemanê derdorî bivîno mabênê endaman de koordînasyon temîn kena. Seba nê amacî şeno zerreyê xo de yewîya xizmetî rone.
• Qadê fealîyetê Yewîye de û raştayê hedefê averşîyayîşê dewamdarî de, seba ke dekewo averşîyayîşê sosyal, ekonomîk û kulturî xebate kena, cigêrayîş-anketî kena, nê cayan de xebatan de ca gêna û kewena. Xebatanê ke yenê kerdene şarî û meqamanê eleqedaran reyde pare kena.
• Platformanê neteweyî û mîyanneteweyî de û vernîyê rayberîya merkezî de temsîlîya endaman kena. Derheqê tertîbatê huqûqî û îdarî de; cigêrayîş kena, fikir virazena, bi nameyê şaredarîyan fealîyetê lobî kena.
• Raştayê amancanê Yewîye de; sazgehanê mîyanneteweyî, yewîyanê rayberîya herêmkî, komeleyan ûsn. reyde têkilî ronena, hemkarîye kena, projeyê ortaxî ramena. Eke lazim bibo nê tewir sazgehan rê bena endam, temsîlîya şaredarîyanê endaman kena, têkilîyanê şaredarîyanê endaman ê bi nê sazgehan û şaredarîyanê welatan ê bînan reyde mîyankarîye kena.
• Bi averşîyayîşê têkilîyanê embazîya bajaran mabênê endaman û bajar û şaredarîyanê bînan de, kewena averşîyayîşê aştî û biratî.
• Prosesê YEyî de derheqê rayberîyanê herêmkîyan de seba karanê ke ganî bêrê kerdene û amadekarîyan destek bido, şaredarîyanê endaman rê seba ke programan û îmkananê sey hîbe, ardimê teknîkî, pêşeştişî ûsn. ê YEyî ra îstîfade bikerê ardim kena. Çarçewaya muzakereyanê endamîya Yewîya Ewropa de, şaredarîyanê endaman rê xebatanê eleqedarê rayberîyanê herêmkîyan de beşdar bena, destek dana, seba nê amacî şena zerreyê xo de yewîya xizmetî rone.
• Yewîye, milkê mendegêr gêna, roşena, kirê kena, dana kirê, pîya şuxulnena.
• Goreyê qanûnanê eleqedaran û hukmê nê nîzamnameyî her tewir fealîyet û teşebusî ke do bikewo averşîyayîşê şaredarîye, kena. Planê stratejîkî û plansazîye kena, xebatanê nê tewir ê sazgehanê şarî û taybetiyan de beşdar bena.